இயக்குநரும், நடிகருமான சமுத்திரக்கனி கதையின் நாயகனாக முதன்மையான கதாபாத்திரத்தில் நடித்திருக்கும் ‘திரு. மாணிக்கம்’ எனும் திரைப்படத்தின் வெளியீட்டு திகதி அதிகாரப்பூர்வமாக அறிவிக்கப்பட்டிருக்கிறது.
இயக்குநர் நந்தா பெரியசாமி இயக்கத்தில் உருவாகி இருக்கும் ‘திரு. மாணிக்கம்’ எனும் திரைப்படத்தில் சமுத்திரக்கனி, ‘இயக்குநர் இமயம்’ பாரதிராஜா, தம்பி ராமையா, ஸ்ரீமன், வடிவுக்கரசி, கருணாகரன், இளவரசு உள்ளிட்ட பலர் நடித்திருக்கிறார்கள்.
எம். சுகுமார் ஒளிப்பதிவு செய்திருக்கும் இந்த திரைப்படத்திற்கு விஷால் சந்திரசேகர் இசையமைத்திருக்கிறார். தனிமனிதனின் சுய முன்னேற்றத்தை மையப்படுத்தி தயாராகி இருக்கும் இந்த திரைப்படத்தை ஜி பி ஆர் கே சினிமாஸ் எனும் நிறுவனம் சார்பில் தயாரிப்பாளர்கள் ஜிபி ரேகா ரவிக்குமார் – சிந்தா கோபாலகிருஷ்ண ரெட்டி -ராஜா செந்தில் ஆகியோர் இணைந்து தயாரித்திருக்கிறார்கள்.
இப்படம் தயாராகி வெளியீட்டிற்காக நீண்ட நாட்களாக காத்திருந்தது. இந்த நிலையில் இந்தத் திரைப்படம் எதிர்வரும் டிசம்பர் மாதம் இருபதாம் திகதியன்று உலகம் முழுவதும் பட மாளிகையில் வெளியாகும் என பிரத்யேக புகைப்படத்துடன் அறிவிக்கப்பட்டிருக்கிறது.
இதனிடையே டிசம்பர் மாதம் இருபதாம் திகதியன்று வெற்றிமாறன்- விஜய் சேதுபதி -சூரி – ஆகியோரின் கூட்டணியில் தயாராகி, ரசிகர்களின் பெரும் எதிர்பார்ப்பில் இருக்கும் ‘விடுதலை 2’ எனும் திரைப்படம் வெளியாகிறது என்பதும், அதே திகதியில் இயக்குநராக இருந்து நடிகராக உயர்ந்திருக்கும் சமுத்திரக்கனி நடித்திருக்கும் ‘திரு. மாணிக்கம்’ திரைப்படமும் வெளியாவதால் ரசிகர்கள் உற்சாகமடைந்திருக்கிறார்கள் என்பதும் குறிப்பிடத்தக்கது.
